समतोल 

एकतर

सगळ्यांना घेवून जा 

प्रसरण पाव 

टोक गमव 

किंवा 

टोक काढत रहा 

सगळ्यांना गमव 

मरण पाव 

निर्वाणापुर्वी 

समतोल 

इमेजिनेशन  आहे 

-------------------------------------------

घाट 

तुझे भक्त वाढत जातील 

तर क्रांति होईल 

पण वाढतायत ते फक्त डीलर्स 

मला कळत नाही 

तू त्यांच्या वाटाघाटी 

उघड्या डोळ्यांनी का सहन करतोयस 

कि वाट पहायला लावणारे हे घाट 

तुझेच आहेत ?

------------------------------------------------

आणिबाणी 

जोवर मी कमावतोय 

तोवर मी नातेवाईकांचा आहे 

एक दिवस असा येईल 

मी जख्ख म्हातारा होईन 

मग पर्याय दोन उरतील 

माझ्यासाठी आत्महत्या 

तुझ्यासाठी निर्वाण 

तो क्षण खरा 

आणीबाणीचा असेल 

मी त्या क्षणासाठी 

काळाला टोक काढतो आहे 

-----------------------------------------------------

अडगळ 

मी ह्या समाजात 

अडगळ म्हणून पडून 

कित्येकांना गेलास सापडून 

मला नाही 

तुझे नाव घेताच माझे मोरपीस होते 

निर्वाण म्हणताच मी मोर होतो 

कोल्हापूरकर  म्हणतात

बघा बघा बघा 

अडगळ पिसारा फुलवून नाचतीये 

अडगळ डान्स विथ झंकार बिट्स 

त्यांना माहित नाही 

मी तुझ्या तांडवाचे 

लेटेस्ट मॉडेल आहे 

जे अडगळ  म्हणून 

सर्वत्र कोसळते आहे